वैजापूर : गंगापूर-वैजापूर रोडवरील वीरगाव पाटीजवळ एका अज्ञात वाहनाच्या धडकेत दुचाकीस्वार ठार झाल्याची घटना शनिवारी मध्यरात्री घडली. दिलीप एकनाथ शिंदे (वय 37 वर्षे, रा.गाढेपिंपळगाव) असे या अपघातात ठार झालेल्या दुचाकीस्वाराचे नाव आहे.दिलीप शिंदे हे शनिवारी मध्यरात्री वैजापूर-गंगापूर रोडने दुचाकी (क्र. एमएच 20/सीजी 1012) वरून घराकडे जात होते. वीरगाव पाटीजवळ समोरून आलेल्या भरधाव वाहनाने त्यांच्या दुचाकीला धडक दिली. यात दिलीप हे चिरडले गेले. येणार्‍या-जाणार्‍या वाहनचालकांनी थांबून त्यांना जवळील खाजगी रुग्णालयात दाखल केले. तेथील डॉक्टरांनी दिलीप यांना तपासून मृत घोषित केले. या अपघाताची माहिती कळताच वैजापूर पोलिसांनी घटनास्थळी दाखल होत वाहतूक सुरळीत केली. धडक देणारे वाहन मात्र अपघात होतात घटनास्थळावरून पसार झाले आहे. या अपघाताची नोंद वैजापूर पोलिस ठाण्यात करण्यात आली आहे.